El mio nome ye Antón Caamaño Vega, nací en Xixón, tengo agora 51 años y la mio profesión ye la d’actor y director d’escena, colo qu’implica dedicase a eses xeres dende un llugar como Asturies, onde’l trabayu artísticu ta perprecarizáu y onde lo más normal ye emigrar a dalgún otru sitiu onde se pueda vivir d’ello. Pesie a too, estudié interpretación, dirección d’escena na ESAD, tengo un máster n’historia y Analís sociocultural, y fice’l doctoráu n’Artes Escéniques. Procuro calteneme alloñáu de mentideros y adulaciones, colos que’l mio gremiu ta mui venceyáu, por desgracia, y trabayar dende la homildá y el rigor profesional na xera que me toque; llocutor, cantante, actor, conductor de furgonetes, mozu de carga y descarga, director d’escena, comercial… En fin, lo que ye ser actor nuna compañía de teatru de la periferia.
Magar que siempres collaboré de formes estremaes con organizaciones de la izquierda, nunca milité en dengún partíu enantes. Nel tarrén sindical, fui miembru fundador del sindicatu Unión d’Actores d’Asturies, y secretariu xeneral del mesmu dellos años. Per otru llau, la estaya de la llingua y la cultura asturiana siempres m’interesó, bien como activista o como investigador, por exemplu.
L’arte y el teatru, poro, son disciplines que permiten construir mundos diferentes. Pienso que la política ye un preséu que s’emplega pa eso, nel meyor de los casos, y pa construyir un mundu meyor y más xustu. Por eso me prestaría que Xixón seya un llugar onde la cultura llegue verdaderamente a tolos ciudadanos y ciudadanes, inclusive los o les que nun tienen pa pagar una entrada. Otru enfotu sería algamar que en Xixón y n’Asturies, los y les trabayadoras d’esta estaya artística pudieran vivir dignamente del so trabayu, y qu’ésti tuviera la consideranza adecuada. Y otru, frañir l’aisllamientu, tanto cultural como social, y potenciar la collaboración ente los ámbitos llocal, autonómicu y estatal de la nuesa organización, col envís d’ellaborar planes integradores y desendolcar aiciones nes que la profesión y la ciudadanía seyan los protagonistes. De lo particular a lo universal.