Xixonés de Vega, pueblu de la zona rural de Xixón, al llau de la Mina la Camocha. Soi llicenciau en Filosofía y tengo un máster en Estudios Sociales de la Ciencia pela Universidá d’Uviéu (y sí, tengo’l ya famosu TFM en regla). Soi profesor interín d’Educación Secundaria. Como bona parte de la xente de la mio xeneración, tocome pasar llargues temporáes nel desempleu y sofrir la precariedá pasando per diversos trabayos.

Entamé a participar en política nel mio periodu d’estudiante, allá pola década pasada, collaborando dientro’l movimiento estudiantil na organización de les protestes contra’l Plan Bolonia y otres reformes empobinaes a mercantilizar la enseñanza y degradar el derechu a la educación, coles  consecuencies que tan viéndose güei. Tamién participé, equí a nivel puramente de base, nes movilizaciones de la zona rural de Xixón contra aquel PGOU que pretendía una urbanización xabaz de les parroquies rurales del nuestru conceyu, y que foi baltáu nos tribunales dempués de masives protestes vecinales.

Soi miembru de la Sociedad Cultural Gijonesa, entidá que dedícase al fomentu del pensamientu críticu y alternativu, asina como al espardimientu y la apropiación social del saber dende una visión participativa.

Milité dalgún tiempu en IU. Xuníme a Podemos al ver equí un instrumentu afayadizu pa armar un frente ampliu capaz de face-y frente a les polítiques d’austeridá y los taragaños nos derechos sociales y civiles que sufren España y Asturies. Formé parte del equipu d’argumentariu de Podemos Asturies nes elecciones del 20D.

Paezme que, pola la mio esperiencia nel movimientu cultural y nel activismu, puedo aportar al desendolcu del proyectu de Podemos en Xixón. Naguo que Xixón pueda, nel añu próximu, convertise n’una de les Ciudaes del Cambiu, nes que ta cuayando ya un modelu de sociedá que pon los derechos e intereses de la mayoría nel centru la política.